Seigneur ou lé grand ou lé tout-puissant,
Refrain
Seigneur ou lé grand ou lé tout-puissant,
comm’ la rosée, vient tombe dessus nout’ tête.
Pardon seigneur pou mon vilain causé,
Pardon seigneur pou tout’ sak moin la fé,
Seigneur, Seigneur prend Pitié.
Out’ chemin seigneur, chemin la vérité.
Même si mon cœur lé crouté,
Donne à moin in’ ptit place su out’ sentier,
Pou moin travers ek ou su chemin de la paix.
Mi voudrai tant seigneur, qu’ou devient mon zarboutan,
Comm’ in poteau d’ coin, ou tiembo à moin,
Ou empêche à moin d’ palanquer,
Mi veux pas chaper et capoter dan’ malizé.
Mon cœur Seigneur, mon cœur lé dur comm’ galet, change a li,
Ren’ à li ten’ comm’ la rosée.
Out’ parole Seigneur, out’ causé,
Mi veux qui touche mon cœur,
Pas comm’ de l’eau su feuille songe, non !
Mais comm’ ptit farine la pluie, su ptit z’herbe dan’ la forêt,
I reste longtemps, i rent’ dan’ le ban’ ptit cœur,
I descen’ en profondeur, jusqu’à dan’ le ban’ racine,
I fé lève bourgeon, l’aut’ coté bordage la ravine.
Et là, li reste toujours frais et prêt,
Pou accueillir les rayons d’ soleil.
Seigneur, c’est comm’ ça même mi veut, que mon coeur lé pareil,
Pou accueillir out’ lumière, la lumière la pou la vie éternelle.
Ecoute seigneur, mon causement, mon prière qui sort’ au fond’ mon cœur,
Ça lé vrai vraiment.
Annonces générales :
Annonces générales :
Site réalisé avec SPIP 2.0.3 + AHUNTSIC
